I en gran plezir ozordi pour Lazans Kreativ dan Lenstiti Lar e Kiltir pour asosye li avek Ne Kreol.

 

Ne Kreol i en biznes ki spesyalize dan lenz zanfan e bann akseswar enspire par nou kreolite e nou langaz ki promot nou kiltir e leritaz Seselwa.

 

En tel linisyativ par Seselwa i merit tou nou sipor e lankourazman, e se pour sa rezon ki Lazans Kreativ Sesel pe asosye li avek tel proze.

 

Labirman ki nou met nou zanfan i annan en lenpak enorm lo zot devlopman sikolozik e i pa zis ki manyer lasosyete i vwar sa zanfan.

 

Labirman i devlop sa fabrik sosyo enterlektyel ou zanfan.  Avan lemonn i vwar ki ou zanfan pe mete, ou zanfan li i vwar lemonn atraver sa ki i pe mete e sa i komans enpakte li fizikman e mantalman menm si sa zanfan pa pe enterakte avek lasosyete.  Sa i kapab annan reperkisyon negativ ou positiv  lo zot devlopman koman en endividi e menm kontribye pou fer zot perdi zot vre lidantite.  Alor i enportan ki nou reflesir byen koman adilt kwa ki nou met nou zanfan e akoz.

 

Mon swete ki bann paran i reflesir lo sa konsey pou lavenir si nou vreman kontan nou zanfan.

 

Ozordi koman paran, en nouvo lorizon in ouver.  Ne Kreol i ofer en swa pou lenz ek akseswar ‘Made in Seychelles’ an servan nou bann atou kiltirel Seselwa e nou lalang Kreol.  Lalang Kreol i sa premye mo ki nou zanfan in tande depi 9mwan e ler zot vwar lalimyer lemonn pou premye fwa.

 

Annou reflesir lo la e fer en bon swa.

 

Ser envite, Ne kreol i merit parmi sa sours lenspirasyon pou bann lezot biznes me osi sa pioner dan promouvwar nou kiltir e leritaz atraver lanmod e bann akseswar e zot fer Sesel fyer e mon profit sa lokazyon pou remersye zot pou asosye avek nou pandan Festival Kreol.  Mon swete ki Seselwa I konpran zot mesaz e siport zot devlope e epanouir koman en biznes.

 

Lesantiyon zot bann prodwir ki mon’n vwar, i a en nivo enternasyonal e nou swet zot siske pou lavenir.  Napa keksoz ki pou fer nou pli fyer ler nou pou vwar zot reisi lo nivo enternasyonal atraver zot slogan « Nou langaz, Nou Kiltir, Ou akseswar.

 

Mersi